دي اكتر جملة باسمعها من اول ما جيت كندا. كل ما اقول ملحوظة ايجابية عن البلد، او اني – بعد الشر يعني- مبسوطة من حاجة

وبالرغم من اني كمّلت ٦ شهور في البلد، وشفت إيجارات البيوت المبالغ فيها،والحمد لله اشتغلت وشفت بعيني مرتبي وهو بيتقص منه الضرائب وجربت البرد علي خفيف كدة، الا اني مازلت – بعيد عنكم طبعا- مبسوطة ومتفائلة ومقتنعة اني اخدت الخطوة الصح ليّ ولاسرتي الصغيرة.

طيب انت لما بتقول لي ” انني شوفتي حاجة” انت فاهم الكلمة دي بتضايق قد ايه؟ ليه بتخوفني من اللي جاي؟ ليه بتحسسني اني سيبت اللي ورايا واللي قدامي عشان سراب؟ ليه عاوز تقلل استمتاعي بحياتي الجديدة؟

انت مش بتنصحني علي فكرة، ولا بتدّيني معلومة مفيدة، ولا بتقول لي استعد ازاي لاي حاجة. انت من الاخر بتعكنن عليّ بس.

وبعدين انت جاي كندا ومستني منها ايه؟ لو منتظر مقابل لتعبك وشقاك، وانك تاخد قد ما بتدّي من تعب واجتهاد وشغل علي نفسك وتطوير مهاراتك يبقى احب ابشرك انت في المكان الصح. أما لو جاي كندا تقعد في البيت وتقول يا حكومة اصرفي عليّ، فا انت للاسف لبست في حيطة.

انت استعديت لخطوة الهجرة؟ ما انت لو جيت كندا وتفاجئت بالبرد القارس في الشتاء، او بالضرائب العالية جدا، او تحديات تربية اولادنا، يبقي انت مش مذاكر كويس قبل ما تيجي. لان دي معلومات اساسية وبديهية. لازم تذاكر كندا كويس جدا جدا قبل ما تقدم علي خطوة الهجرة. واعرف ان كندا package علي بعضه فيه الحلو والوحش يا تقبله كله يا تتركه كله

بس من فضلك اعرض المعلومة كاملة: لان نص المعلومة يساوي معلومة خطأ. يعني من فضلك ما تقولش انك بتدفع ضرائب أكثر من ٥٠٪؜ من غير ما تقول ان دي اعلي شريحة ضريبية. بيدفعها اللي دخله اكتر من رقم معين. لكن تقول لي الضرايب ٥٠٪؜ في المطلق كدة دي معلومة مضللة

اخيرا، انا مش باطلب منك إعطاء صورة وردية لان دة برضه بيضر مش بيفيد. كل المطلوب، نظرة محايدة ايجابية. لو مزنوق قوي انك تذكر العيوب- وهي موجودة فعلا- يا ريت تذكر معاها المميزات
وياريت تفتكر ان المهاجر اللي لسه جاي جديد، اخد الخطوة دي لانه بيبحث عن مستقبل أفضل. وانه في كتير من الاحيان ماعندوش خط رجعة، علي الاقل بدون خسائر فادحة. بالتالي جرعة تفاؤلية ايجابية لن تضر اي احد ولكنها من الممكن ان تفيد جدا جدا جدا.

9