و من حسن حظي إن اصدقاءي سهروا معايا اليوم ده لحد ما رجعت حماتي من بره ،و اللي كانت سكرانة على الأخر.. و بمجرد ما دخلت البيت، اتكعبلت على الأرض و اتخرشمت و نزفت من وشها .. و للأسف كانت بترجع كمان..
طبعا قمت اشوفها، و لقيتها في حالة مذرية، لكن جوز صديقتي ساعدني و دخلناها اوضتها، و نظفت الدم و الترجيع من وراها..
المشكلة الكبرى انها حاولت هي و ابنها انهم يثبتوا في المحكمة بعد كده اني ضربتها، لكن كان عندي شهود و كان ادعاؤهم باطل.. و ده يثبت ان نهاية خدمة الغز علقة.. و فعلا مفيش فايدة فيهم!
و جه تاني يوم، و سافرت حماتي ،وحقيقي كسرت من رواها قلة.. و حسيت اني بودع محتل كان محتل بيتي ،و قلت بيني و بين نفسي: وداعا بونابارت.. و بصيت على البيت و لأول مرة يكون لي كله ..انا و ابني.. ولوحدي هستمتع به لمدة 20 يوم.. من غير شريك، ولا حماة، ولا أي بلاوي زرقاء..
و كملت فترة المهرجان لحد ما خلص .. و رفضت جارتي انها تاخد مني اي فلوس على فترة انها قعدت 10 ايام مع ابني، و بصراحة كان موقف نبيل منها جدا..
و بدأت احط في دماغي فكرة اني هطلع من البيت ده على سكن (السينجل مام) حتى لو مش عاجبني،بس لأن سعره كان كويس جدا، و لأنه مؤقت فحاولت اشجع نفسي.. لكن قلبي كان مش مطمن..
و حكيت للأخصائية الإجتماعية على كل التطورات، و كانت سعيدة بها، و أكدت علي أن موضوع السكن مش قضية كبير.. اهم حاجة يكون بيني و بين السينجل مام عقد واضح..
و في اليوم ده وانا طالعة من المركز.. لفت نظري إعلان عن دورات تدريبية مدتها شهرين للي عايز يأسس مشروعه في كندا..
وقتها افتكرت شنطة الملايات اللي كنت جايباها من مصر، و خدت الإعلان و قررت اني اسجل ..
وفعلا بعت ايميل في نفس اليوم و رد علي شاب من اسمه كان باين انه عربي.. و الشاب ده هيكون من أعز و أقرب الأصدقاء بعد كده..
و رحت المركز تاني يوم، و قدمت كل الأوراق المطلوبة من صورة كارت الإقامة بتاعتي، و شهادة إجادتي للغة الإنجليزية، و سجلني الشاب وكان فلسطيني و قمة في الأخلاق، و قال لي:
“تمام البرنامج ده هيبدأ أول شهر نوفمبر يعني لسه معاكي وقت.. بس خدي بالك الحضانة اللي هنا مش هينفع تاخد ابنك لانه صغير تحت عمر سنة، وبالتالي لازم تدوري على حضانة لأن البرنامج ده من ص9-ظ3 يعني يوم كامل وكل يوم”
و هنا هيجي دور الحضانة و اللي فعلا كنت مقدمة عليها من ايام و انا حامل، بس مكنتش متأكدة اني ممكن احط ابني فيها من دلوقتي حتى وانا لسه في اجازة الأمومة، و عايزة احضر برنامج تدريبي..
و فعلا كلمت قسم الحضانة في البلدية و تابعت معاهم طلبي و قالوا لي:
“مفيش مشلكة خالص.. اهم حاجة تدوري انتِ بنفسك على الحضانة و تلاقي فيها مكان، بعد كده نبدأ احنا بالتنسيق معاهم ”
و فهمت ان دي خطوة لازم اعملها و هي البحث عن حضانة.. الحلو في الموضوع ان كان معايا الوقت حوالي شهر ونص اني ادور لحد ما الاقي حضانه تاخد الطفل، و اللي لو راح هناك هيبدأ و هو عمره 7 شهور بالظبط..
و بدأت اعمل بحث ،و فهمت ان السن الصغير ده مش كل الحضانات بتاخده خصوصا المدعمة، و كان افضل و انسب نوع لعمره هو نوع من الحضانات اللي بتكون مرخصة من الدولة لكن تدار من البيت و اسمها (حضانة منزلية – هوم داي كير)..

و بدأت اعمل بحث، واتصل و اكلم معظم الهوم داي كير.. بس فهمت انهم مقسمين حسب المنطقة، و من الافضل الاتصال والتسجيل مباشرة مع وكالة بتكون تحتها كذا حضانة في نفس الحي..
و فعلا وصلت لوكالة هي اللي بتشرف على عدد من الحضانات في المربع اللي كنت عايشة فيه، و استنيت انهم يبعتولي عن الحضانات اللي ممكن يكون عندها مكان فاضي على أول نوفمبر..
و بكده الخطوة دي شبه خلصت، بس فاضل النتيجة ،و دلوقتي هرجع تاني واحاول اركز على السكن الجديد..
و بعت للسينجل مام و طلبت منها انها تعمل لي عقد، بس هي مكانش عندها نية للعقد، و قالت لي:
“ولزمته ايه العقد.. انتِ جيالي من طرف صديقتي اللي هي جارتك”
قلت لها:” لا العقد هو اللي يضمن لي حقي.. لازم عقد”
و قمت انا بنفسي بالبحث عن نموذج لعقد إيجار، و طبعته و ادتهولها، و قريته و مضت، و أنا مضيت قدامها..
و اتفقنا اني هنقل من يوم 1 اكتوبر، و دفعت لها الف دولار ..كانت كل الفلوس اللي قدرت احوشها لاني مكنتش دفعت الشهر ده في الإيجار، وبالتالي وفرت المبلغ ده.. و قالت لي:
“تمام.. انا مش هاخد منك تأمين.. الفلوس دي كأنها شهر ونص مقدم من الايجار”
و علشان تبين لي حسن نيتها اللي هي مش حسنة بالمرة ادتني المفتاح، و قالت لي:
“المفتاح اهو.. معاكى اسبوعين لو عايزه تبدأي تنقلي حاجتك من دلوقتي .. بس انا هنضفها لك قبل ما تروحي، و هشيل كراكيبي من هناك”
كان جوايا اسئلة كتير عن البيت ده، و كنت حاسة ان وراه حكاية كبيرة.. و طبعا الست توهتني..
و سألتها:” ليه البيت ده رخيص؟ و ليه كل البيوت اللي حواليه شبهه؟”
قالت لي:” اسمعي.. ده سكن حكومة انا خدته لما قدمت على اني سينجل مام.. و حاليا انا ساكنة في مكان تاني و بالتالي باجر البيت ده”
كنت وقتها مش مستوعبة الناحية القانونية للكلام ده بس سألتها:
“و انتِ من حقك تأجريه عادي؟”
قالت لي:” آه عادي، و الدليل إني رديت عليكي على الفيس بوك .. فاكرة”
و بصراحة كنت حاسة ان كلامها مش مقنع و كله كدب و لوع ، وبالرغم من احساسي الا اني حاولت اني أتغاضى عنه لاني فعلا مكنتش لاقية مكان تاني، و كان موضوع السكن أزمة كبيرة بالنسبة لي..
و نضفت البيت بعدها بيومين وقالت لي:” يلا استعدي تنقلي حاجتك، و يوم ما تنقلي هكون معاكي”
و حكيت للمغربي اللي كان بيحاول يلاقي لي سكن ، بس و لا حاجة رضيت بي وقال لي:
“انا حاسس ان القصة دي وراها إن، لكن هتعملي ايه.. اهو حل مؤقت.. و هبقى اساعدك في نقل الحاجة على قد ما اقدر”
أما جارتي استاذة الانجليزي اللي في البيت الخامس عرضت علي انها تساعدني، و تكون معايا و مع البيبي يوم النقل، و كمان طلبت من صديقة لها و جوزها عنده عربية كبيرة انهم ييجوا يساعدوني..

و مع المساعدات دي ..طلبت كمان عربية كبيرة علشان تنقل لي العفش ، دي لوحدها خدت 500 دولار..
كنت مفلسة فلس رهيب بعد ما دفعت كل ما أملك في النقل و العقد الجديد.. لكن قلت مش مشكلة المهم اني ارتاح و بدل ما ادفع 2000 دولار هدفع 700 و ده فرق كبير جدا، و كمان فلوس البيبي قربت تجيني و الدنيا هتكون أحسن..
و جهزت كل حاجة و لميت البيت كله، و كانت جارتي بتساعدني، و عرضت علي انها تجيني بكرة علشان تكون واقفة معايا في يوم النقل العالمي..
و نمت في البيت اخر ليلة قبل ما امشي منه.. يا ترى كانت الليلة دي عاملة إزاي؟

8