كنت أنا و الشاب الروسي بس اللي حضرنا أخر يوم، لكن البنتين التانيين ماجوش و قرروا انهم حتى ما يطلبوش الشهادة.. و اتصلت بواحدة منهم و قالت لي:
“انا بصراحة ما استفادتش من المركز ده، و استفادت اكترمن المركز اللي حضرت فيه برنامج شبيه قبل ما اجي عليه”
و سألتها:” بجد! طيب إيه اسم المركز التاني؟”
قالت لي:” اسمه Access – أكسيس”
و كتبته عندي، و قررت اني بعد ما اخلص مع المركز ده اني اسجل مع المركز الجديد خصوصا ان مركز تورنتو لسه قدامه لنهاية شهر فبراير علشان ابدأ معاهم يعني عندي شهر يناير و نص فبراير كله فاضي، و بالتالي البرنامج ده هييجي في وقته..
و ماجتش المدرسة لأنها كان طلع قرار إنها تمشي، لكن قعد معانا الشاب الفلسطيني الطيب اللي عرفنا اننا هيكون لنا مميزات كتير لأننا كملنا البرنامج و كانت:
1- من حقنا ندخل مسابقة مع الدفعة اللي اتخرجت و نقدم فكرة مشروعنا و كانت مكاسبها 50 دولار مقدمة من مطبعة خاصة بعمل البزنس كارد و أي مواد تسويقية، و كمان استشارة ساعتين مع متخصص في التسويق
2- استخدام مكان مخصص للمتخرجين اسمه (بيزنس هب- Business Hub) و المكان ده فيه أحدث الكمبيوترات و طباعة و كمان بروجكتير و قاعة اجتماعات صغيرة تسمح للمتخرج انه يقابل العملاء فيه، و كمان يشتغل منه كمكتب له.
3- شهادة تخرج تفيد أننا أتممنا البرنامج كاملا
عجبتني المميزات، لكن اكتر حاجة شدتني كانت المسابقة و طبعا المكتب..
و اتناقشت مع الشاب الروسي اللي مكانش متحمس ابدا و قال:
“انا فكرتي ضعيفة و مش واضحة بالنسبة لي، وبصراحة انا ما استفادتش من البرنامج.. انا مش عايز اشارك في المسابقة، و لا عايز المكتب، و لا محتاج الشهادة في حاجة”
و شكرت جدا الشاب الفلسطيني، وسجلت اسمي في المسابقة، و عرفت انها كمان يومين..
و طلب مني الشاب الروسي اننا نقعد في الكافية اللي عند المركز لأنه كان عايز يدردش معايا شوية..
و قعدت معاه في الكافية، و صمم يعزمني على قهوة..
و رجع و هو معاه القهوة و قعد و قال لي:
“اخبار محكمة الأسرة ايه معاكي؟ انتِ عارفة انا دايما ببقى عايز أسألك، بس من كتر تركيزك على موضوع البيزنس و الورشة اللي احنا فيها بتكسف أسألك..”
قلت له:” لا عادي مفيش حاجة.. المحكمة معندهاش اي جلسات في ديسمبر و عندي جلسة الشهر الجاي و لسه واضح ان الدنيا مطولة شوية”
قال لي:” انتِ عندك أطفال؟”
قلت له:” اه عندي ولد.. و الفكرة ان حاليا كل موضوع الدعوى بتدور حوالين نفقة الطفل و حضانة الطفل، و بعدين لما يتحكم فيها و يعدي سنه ابقى اخد خطوات الطلاق”
قال لي:” أنا حاسس بكِ جدا.. عارفه ليه؟”
قلت له:” ليه؟”
قال لي:” اصل انا كمان بطلق”
استغربت جدا الكلام، و بصراحة مكنتش متخيلة انه بيمر بالتجربة دي ابدا..
و كمل كلامه معايا و قال:”انا جيت كندا مخصوص علشان اتجوز اللي بحبه و في الاخر اتغير و سيبنا بعض”
لاحظت انه بيتكلم بصيغة المذكر، لكن كنت بقول يمكن بيغلط في الضمير لأن الانجليزي بتاعه كان بعافية شوية..
و رديت عليه وقلت له:” و عندك أطفال؟”
قال لي:” لا ماعندناش.. و ابتسم ابتسامة غريبة فيها غموض على سخرية”
و بدأت اشرب القهوة بتاعتي، و بص لي و قال لي:
“انا كنت بحبه جدا، بس هو مشاعره اتغيرت من ناحيتي و انا حاليا بمر بمرحلة علاج نفسي بسببه”
و حاولت اصلح له الضمير مع اني مش من نوع الناس اللي بتحب تصلح للي قدامها لأني حقيقي بتحرج جدا من النقطة دي، و قلت له:
“معلش هو الضمير مذكر.. انت اكيد تقصد هي مش هو صح؟”
ابتسم ابتسامة عريضة وقال لي:” لا هو.. انا جوزي رجل”
و مكملتش فنجان القهوة و بحلقت له أوي و قلت له:” رجل؟!”
قال لي:” اه.. انا جيت كندا مخصوص علشان اتجوزه.. اهلي كانوا معارضين و مش متقبلين اني اتجوز رجل أو بصفة عامة هم ضد جواز المثليين، بس انا مشاعري كلها ناحيته و عمر ما كان لي أي علاقة ببنت”
كنت مش عارفة ارد عليه واقوله ايه، بس كنت متفاجأة جدا.. و سكت
و رجع و قال لي:” عموما انا هنا لو احتجتيني.. انا عارف الالم النفسي اللي بتمري به بعد الانفصال، و لو احتجتي حتى لأي علاج نفسي انا اقدر اقولك تعملي ايه..”
مقدرش انكر انه كان لطيف و كان بيحاول ينقل لي تجربته، لكن وجهة نظره مختلفة عن وجهة نظري تماما، و طبعا انا مش في مكان علشان اقول له اصلا وجهة نظري في جوازه من رجل.. و لو اني رأيي من رأي أهله في الاساس، لكن طبعا احتفظت بالكلام ده لنفسي فقط…
و حقيقي الشاب ده كان دائم السؤال علي و كان دايما يسألني عن حالتي النفسية و لو محتاجة اي حاجة و هي اني بس الاقي حد يسمعني لو مش لاقية حد يسمعني.. و لأنه يمكن كان حاسس بكل ده و حس اني تشابهت معاه في تجربة انفصال فحاول يساعدني على قد ما يقدر..
و رجعت البيت و انا عندي هدف ..وهو المسابقة اللي كمان يومين و هدخل فيها مع دفعة كاملة كانت مكونة من 8 أشخاص و انا رقم 9.. يا ترى مين كسب في المسابقة ؟

6