كانت الدعوة اني احضر تجربة جديدة و كأني هصور و أخرج فيلم في استوديو عاملينه داخل سينما المهرجان اللي في داون تاون TIFF BellLightbox
يومها طلعت البدلة السوداء بتاعتي من الدولاب و لبستها … و بعد خلصت برنامج البيزنس طلعت على السينما علشان اعيش التجربة دي..
ودخلت المكان اللي بالنسبة لي عالم ساحر، وخيالي بينقلني من العالم الواقعي لعالم الاحلام اللي بحبه جدا..
و تقمصت دور المصورة شوية، و بعدها دور المخرجة و لمست ماكينات تصوير عمري في حياتي ما شوفت زيها.. و شوفت معدات قيمة جدا و كأنه معرض مخصص لصناعة السينما.. السينما اللي حقيقي اكتر شيء بحبها، و افتقدتها من وقت الكورونا..
و بعد ما قضيت اليوم الجميل و صورت صور حلوة علشان تكون ذكرى من ضمن ذكرياتي السينمائية، بصيت في مراية كبيرة قبل ما اطلع من الاستوديو.. و كانت اول مرة اشوف حلم عن قصة حياتي بس مش في كندا قصة حياتي في دبي، و كأنها بتتصور في اللوكيشن ده.. و كأنه بقى حلم جديد عندي اني احول قصة حياتي لعمل فني أو سينمائي.. حاجة مكنتش حلمت بها قبل كده!
و مشيت وجريت علشان اجيب البيبي من الحضانة، و بدأت اعرف قد ايه الموضوع ده هيكون متعب، و كان طبعا لازم ابدأ الاقي الحل لأني مش هفضل مكملة ابدا كده خصوصا اني عايزة ابدأ في إدارة مشروعي اللي خلاص قربت اتخرج رسمي من المركز و لازم اثبت اني فعلا بشتغل عليه علشان هيحصل تغيرات كتير في كل حاجة بستلمها من الحكومة بعد كده..
و فعلا بدأت اتصل بكل الحضانات اللي في المنطقة و احط اسم ابني عندهم، لكن لأننا كنا في ابريل فكان توقيت صعب جدا للنقل و انه يفضى مكان.. لكن اقرب حضانة منهم و اللي بعدي بشارعين بالظبط ردت علي وقالت لي:
“في الغالب الاماكن بتفضى في شهر 9 لما الاطفال بيسيبوا مكانهم في الحضانة علشان يروحوا المدرسة”
و ده معناه ان قدامي 5 شهور في العذاب ده.. طبعا مش هينفع، و مش منطقي..
و هنا كان لازم الاقي حل عملي اكتر و هو القرار اللي قررته من يوم تجربة (البلاك ايس) و هو قرار اني اجيب عربية..
طبعا معرفتي عن عالم السيارات زي معرفة معظم الناس الغير صينيين عن كتابة اللغة الصينية.. يعني تقريبا منعدمة..عالم كله طلاسم بالنسبة لي..
وانقسم الموضوع بالنسبة لي لشقين:
الشق الاول اني ادبر فلوس للعربية
الشق الثاني اني اعمل بحث عن ايه العربية اللي اجيبها، و نوعها، و نظامها كمان
و بدأت بالبحث، و الفلوس كنت حاسة انها جاية جاية…
طبعا وقت النقل بالرغم اني كنت خدت مبلغ كويس من الحكومة الا اني صرفت كتير، و حتى الفلوس اللي كنت شايلاها من قبل كده كنت بصرف منها لان كان دخلي مش مغطي كل المصاريف.. و بالتالي شبه وصلت لنقطة الصفر..
وفعلا بحثت على عربيات، و موديلات، و بدأت اتحير طيب اجيبها مستعملة ولا جديدة.. و رسيت اني اجيبها جديدة..
بعد كده رحت اكترمن مكان علشان اجرب عربيات جديدة.. رحت توكيل (تويوتا) و (هوندا) و (هيونداي)..جربت عربيات، و طلعت بها وما ارتحتش إلا في عربية (تويوتا) ..

و بكده ضيقت الاختيار جدا على اني خلاص هجيب عربية جديدة من تويوتا بس موديلها ايه لسه مش عارفة!.. لكن هاستنى شوية لحد ما ادبر لي قرشين على الاقل مقدمة لعربية على الزيرو..
أما على مستوى المحاكم فكان عندي جلسة مهمة جدا مع روميو في محكمة الأسرة و كانت اخر مره اشوفه فيها وجها لوجه..
كان الحكم خاص بالحضانة.. و اتحكم لي بحكم مؤقت بالحضانة الكاملة، بس لسه الحكم النهائي القاضي قالت:
“انا هحكم بالحكم النهائي لما اعرف مصير ابو الولد”
رد المحامي وقال:” هو مقدم طلب حالات انسانية للهجرة بيطالب فيه أنه يقيم في كندا لان عنده ابن كندي”
و هنا انفعلت جدا و رديت و قلت:” إزاي يطالب انه يقعد و يلتحق بابنه؟!”
ردت القاضي و قالت لي:” و إيه المشكلة؟”
قلت لها:” المشكلة انك من ساعة ما حكمتي بحكم النفقة و كان لازم ينفذه من شهر يناير ما دفعش اي شهر واحنا اهو في أبريل.. ممكن اعرف السبب؟”
استغربت جدا و سألته:” ما بتدفعش ليه؟”
قال لها:” لاني بدفع فلوس محامي الهجرة”
استنكرته جدا و قالت له:” لأ ده سبب مش مقنع، و على فكرة هي ممكن تبلغ عنك و تحصل لك مشاكل كتير انك ما بتسددش حكم النفقة”
و بصت لنا القاضي و قالت:
“طيب عموما انا هستنى الجلسة الجاية اعرف مدى التزامه في دفع نفقة الطفل، و كمان اشوف ايه اللي حصل في قرار الهجرة”
و اتحددت الجلسة انها تكون في شهر أغسطس و هيكون فيها الحكم النهائي الخاص بالحضانة..
و مشينا من القاعة، و بصيت عليه للمرة الأخيرة، و بص علي و كل واحد طلع من باب.. و كل واحد خد طريق غير التاني..
والغريب جدا ان فى الوقت ده جالي جواب من الهجرة و سألوني عن تفاصيل قضية العنف الأسري، و عن مدى التزامه بنفقة الطفل لأنه مقدم طلب يلتحق به بإبنه.. و طلبوا مني اني ابعت لهم ما يثبت كلامي من أوراق..
بصراحة حسيت انها فرصة و جت لحد عندي، و طبعا ما قولتش غير الحقيقية.. الحقيقية و بس.. واللي حقيقي كانت كافية انهم يفهموا انه واخد بس ابنه كوبري تماما زي ما كان واخدني انا نفسي كوبري في يوم من الايام علشان الإقامة..
طبعا كانت فترة مشحونة، بس فيها امور مهمة جدا و ردود على اسئلة كتير كانت معلقة لفترة كبيرة..
و إجمالا فشهر ابريل بالنسبة لي كان شهر مليان احداث، بس كان فيه حدث جميل جدا هيساعدني اني اجيب العربية..
يا ترى ايه هو الحدث ده ؟

7