كانت أول جلسة في محكمة الأسرة الموجودة في (جارفيس ستريت)، و اتقابلت مع المحامية اللي اختارتها بعناية بعد ما لغيت طلبي مع الأولى و بناء على ترشيح امهات كتير اختارت المحامية الثانية..
و سيبت البيبي في الحضانة، و طلعت على المحكمة، وبلغت المركز اني هتأخر علشان عندي محكمة..
و انتظرت انا و المحامية في صالة الإنتظار و بصيت لقيت قدامي روميو، والمحامي بتاعه (طبعا محامي تاني غير محامي الهجرة)..
كان باين على المحامي بتاعه انه مش سهل ..أما المحامية بتاعتي فكانت جد جدا و شاطرة و فاهمة كويس كل حاجة..
كانت اول مرة اشوف روميو من ساعة يوم العضة و كان بالظبط عدى عليها 3 شهور و أسبوع..
كان لابس بدلة و متشيك على الأخر، و انا كمان كنت لابسة بدلة، و كل واحد فينا كان يبعده عن التاني مسافة كبيرة، وكلامنا مع المحامين فقط..
و دخلنا القاعة، وحسيت برهبة، و لقيت القاضي واحدة ست و كان شكلها حازم جدا و تقريبا كل اللي كانوا في القاعة ستات، واللي بيساعدوا القاضي..
و نادت علينا.. و قعدنا قدامها كلنا زي الافلام الاجنبي بالظبط، و بدأت المحامية تتكلم، و بعدها بشوية المحامي بتاع روميو..
كان كل الكلام على (حضانة الطفل)، و(نفقة الطفل)، وكان ده موضوع الدعوى..
و سمعت القاضي للطرفين و بس سألتنا انا و روميو على بياناتنا، والتأكيد على وجود طفل بينا اسمه (ماريو) و بياناته..
وخلصت الجلسة، واتطلب من المحاميين أوراق كتير وتحددت جلسة تانية في شهر يناير الجاي..
بس لأن المحامية بتاعتي من الأول طلبت (الحضانة الكاملة) لي.. فروميو و المحامي بتاعه كانوا رافضين الفكرة، وقالوا انهم في الجلسة الجاية هيحاولوا يبينوا حجتهم لأن روميو طالب (الحضانة المشتركة ) للطفل بينه و بيني..
و مشي كل واحد في حاله، لكن روميو مكانش طبعا عايز يسيبني في حالي و كان في الفترة دي كل همه انه يتجسس علي، و كمان يدور على اي طريقة يثبت بها إني غير مؤهلة اني اكون حاضنة للطفل و كانت خطته انه يبين اني غير متزنة نفسيا، أو بمعنى أخر مريضة نفسيا..
و رجعت على مركز التدريب، و سألوني زمايلي عن سبب تأخيري خصوصا انهم شايفين قد ايه انا حريصة على الحضور و أن مرحلة التخطيط للبيزنس دي واخدة كل اهتمامي..
و قلت لهم على السبب ببساطة شديدة، و دي حاجة في بصراحة و مش عارفة هي عيب، ولا ميزة، ولاعادي اصلا.. اني مبعرفش احور، و صريحة، و برد على أي سؤال..
و هنا استنوا وقت البريك.. و لقيت كل واحدة و واحد فيهم وراه حكاية..
اولا عرفت من البنتين أن واحدة منهم متجوزة و مستقرة مع جوزها بس لسه بيحاولوا يشوفوا هيعملوا ايه في كندا
ثانيا عرفت من البنت الثانية انها متجوزة واحدة مش واحد و قالت لنا: انا تقريبا سبب اني سيبت بلدي و جيت هنا اني اتجوز اللي بحبها..
وقتها الكلام هرب مني و معرفتش ارد عليها، بس بعد كده بقيت مبركزش معاها على الموضوع ده خالص، لكن لاحظت ان هي اللي كانت بتحب دايما تركز عليه.. لكن في نفس الوقت كانت البنت شخصيتها لطيفة ،وكنت برضه بحسها خجولة ساعات..
اما الشاب الروسي فكان متعاطف معايا جدا، وسألني و قال لي:
“أكيد فترة صعبة عليكي جدا.. عموما لو احتجتي حد بس تتكلمي معاه انا موجود”
شكرته على اهتمامه، بس مش عارفة ليه كنت حاسة ان وراه حكاية من العيار الثقيل، لكن ماكنش راضي يحكيها وقتها..
و رجعنا للمركز و للتدريب .. كانت اكتر حاجة بتفيدني اني في الفيديوهات اللي بنشوفها كنا بنسمع قصص ناس كتير، و إزاي كل واحد وواحدة بدؤا البيزنس بتاعهم علشان تكون قصص ملهمة بالنسبة لنا..
كنت بحاول فعلا اتخيل تنفيذي لمشروع توزيع الملايات على المحلات، بس كل ما كنت بسمع القصص و اقعد افكر كنت ببعد عن الفكرة، و توقعت اني لما هنفذ هيكون مشروع بعيد عن موضوع الملايات والمفروشات تماما..
أما بالنسبة للفلوس فكنت لسه بستلم فلوس التأمينات بتاعتي اللي فاضل فيها شهر نوفمبر كله و ديسمبر، و بعد كده خلاص رسميا تنتهي أجازة الأمومة و تتوقف فلوس التأمينات..
و بمنتهى السذاجة و انا بعمل التقرير اللي بيكون كل أسبوعين عن طريق (سيرفس كندا) فيما يخص لو استلمت اي فلوس او اشتغلت او اي تغيير في بياناتي كتبت اني بروح تدريب، و لكن من ضعف خبرتي مكنتش اعرف ان التدريب اللي باخده ده و اللي هو شهرين و تبع البيزنس مش التدريب اللي يقصدوه و في الغالب بيكون تبع معهد وبيكون لتغيير المهنة أو المسار الوظيفي (المهني)..
كانت النتيجة كارثية .. و لقيت التأمينات وقفت الفلوس، و طبعا اتصلت علشان افهم منهم السبب و كان الرد:
“مادام كتبتي اني بتروحي تدريب مافيش تأمينات”
حاولت اشرح لهم على التليفون طبيعة التدريب و مدته و فهموا و قالوا لي:
“تمام.. في الحالة دي جيبي جواب من المركز و يكون ممضي و مشروح فيه الكلام اللي قولتيه و ابعتيه علينا بالفاكس”
و فعلا عملت كده و بعت الجواب، و نزلت الفلوس بعد أقل من أسبوع، و حليت المشكلة دي بسرعة، و طبعا اتعلمت الدرس..
كان شهر نوفمبر شهر هادي نسبيا، وكانت حياتي فيه حلوة من انشغالي في برنامج التدريب، و كمان اني اتعرفت على ناس جديدة..
و فكرت في الوقت ده و بما اني شايلة شوية فلوس و بسبب ان عندي جراج في البيت انها ممكن تكون فرصة اني اجيب عربية صغيرة مستعملة اجرب اسوقها لاني طبعا عمري ما سوقت و لا كان عندي عربية… بس طبعا معايا رخصة G2
كان المغربي في الوقت ده دايم السؤال على.. و هنا قررت اني أسأله لو يقدر يساعدني في موضوع العربية دي لأن معنديش اي خبرة فيها، و لا افقه اي شيء عن عالم السيارات..
و فعلا لقيت كم عربية و هو من الاعلانات دي لما بعتهاله اختارلي واحدة، و قال لي:
“لو حابه انا ممكن اوديكي تشوفيها و اقولك رأيي كمان”
و فعلا رحت انا و هو و البيبي و شوفنا العربية، و كنت حتى خايفة اجربها و خليته هو اللي يجربها و قال لي:
“لا العربية دي مش هتنفعك ابدا.. و عموما في حالتك انصحك بعربية جديدة لأن المستعمل هيكون عايز تصليح، و صيانة، و انتِ واضح انك راهبة جدا الموقف.. يعني اخرك تسوقي و خلاص”
و فعلا كلامه كان صح جدا، و كانت هي دي الخلاصة..
يومها عزمني انا و البيبي على العشاء، وكانت والدته موجودة معانا كمان علشان تشيل البيبي شوية لانه طلب منها انه يكلمني في المطعم، و هي تتطلع تتمشى شوية بالبيبي..

و لقيته بيفاتحني في موضوع ارتباط رسمي، و بصراحة و بالرغم من انه شاب كويس جدا إلا اني كنت صريحة معاه، ومحبتش الف و ادور عليه وقلت له:
“انت شاب ممتاز و رجل بجد، لكن انا مش مستعدة ارتبط بحد دلوقتي.. كمان قدامي مشوار طويل لحد ما احصل على الطلاق، ولو هفكر في يوم اني ارتبط بحد لازم ادرس الموضوع زي ما أكون بدرس مشروع تمام، واعمل له دراسة شاملة كمان”
و هنا حس الشاب اني بقفل الباب تماما معاه، لكن أنا كنت بحاول افهمه ان معرفتنا ممكن تفضل كأصدقاء،لكن هو فضل إنه يبعد و أنا احترمت قراره جدا..
كنت حاسة ان طريقي طويل، و غامض، و مش عارفة ايه اللي مستنيني، لكن بالرغم من كل شيء كنت مصدقة في احلامي.. احلامي اللي هاجرت بها على كندا، و كانت و مازالت هي كل ما أملك.. و فعلا زي ما غنت شيرين و قالت:
هحلم و حلمي مصدقاه.. و ان راح لفين هفضل ورآه… و ان جيتي يا دنيا علي مره… طريقي برضه مكملاه
كان الجو بدأ يبرد، و خلاص رسميا ودعنا فصل الخريف أقصر و اكتر الفصول رومانسية، وداخلين على فصل الشتاء أطول و ابرد الفصول الكندية.. بس قررت اني اخد البيبي و نعمل جولة في مكان مكناش رحناه قبل كده.. يا ترى رحنا فين؟

7