كان الأسبوع الثالث في أبريل مبهج جدا وكان فيه حدثين حلوين أوي..
كان الحدث الأول أنه اتخرجت من برنامج البيزنس، و ده معناه اني اقدر اقدم على مكتب دعم مختلف خاص بأصحاب المشروعات الصغيرة..
و اول ما اتخرجت واخدت الشهادة صرفوا لي منحة قدرها 1250 دولار.. حطيتهم في ظرف و رسمت عليه عربية..
أما الحدث الثاني فكان سابق للتاريخ ده بشوية… و هو اني قدمت ملفي الضريبي عن دخلي الشخصي لسنة 2019 و اللي من حسن حظي أنها كانت كلها على التأمينات الإجتماعية و اللي ميزتها أنهم كانوا بيخصموا منها ضرايب، لكن تقريبا رجعت لي في الأخر..
و فعلا في الأسبوع الثالث من أبريل، وبعد ما قدمت ملفي بأسبوعين بالظبط جاني تحويل بمبلغ ألفين دولار و هو المعرف ب (Tax Return- تاكس ريترن)
و سحبت الألفين دولار و حطيتهم في الظرف، و بكده بقى ظرف العربية فيه 3250 دولار..
و قبل ما اتحرك بالظرف و اروح على توكيل (تويوتا) قريت على افضل عربيات تويوتا، و خصوصا الموفرة للبنزين..
و لقيت عربية هايبرد Hybrid كان المفهوم جديد علي، بس فهمت انها بتشتغل ببطارية من غير شحن كهرباء يعني شحنها ذاتي من خلال اني اسوق العربية، و كمان بتشتغل بالبنزين، لكن موفرة جدا غير اى عربية عادية..
و مكدبتش خبر، و تاني يوم رحت على توكيل تويوتا و انا مقولتش لماما خالص أو لأي حد الموضوع ده لأني كنت عارفة ان محدش هيشجعنى خصوصا ان دخلي في الوقت ده كان 1600 دولار يعني قليل جدا..
و انطلقت على (تويوتا)، و دخلت عند الموظف وقلت له:” انا عايزة عربية هايبرد”
قال لي:” اختيار كويس جدا.. انتِ عندك خبرة في الهايبرد؟”
قلت له:” لا خالص.. بس انا عملت بحث و فهمت انها افضل حاجة من ناحية البنزين”
و فعلا أكد على كلامي و قال لي:” برافو.. شاطرة جدا”
و ركبت عربيتين واحدة منهم كبيرة و مش فاكرة موديلها، والثانية فاكرة اسمها لان دي بقت عربيتي..
و سوقت الاثنين و انا خايفة جدا لان كان بقالي مدة كبيرة ما سوقتش، و بعدين انا عمري اصلا ما كان عندي عربية قبل كده..
و شافني الموظف مرتبكة جدا و قال لي:” ايه ده انتِ خايفة جدا و مش متمكنة.. طيب هتعملي ايه؟!”
قلت له:” عادي.. انا معايا الرخصة.. اه بقالها 3 سنين بس عمري ما سوقت والموضوع ممارسة اكيد”
و اخترت عربية Toyota Prius C بس كان لونها ابيض و محبتش اللون الأبيض ابدا، و سألت الموظف لو ينفع يجيلي واحدة حمراء..
قال لي:” أكيد بس هتيجى كمان 3 أسابيع”
قلت له:” مش مشكلة استنى.. انا استنيت كتير جت يعني على اسبوعين”
و سألني:” عايزة نظام الدفع ايه؟”
كنت برضه عملت بحث و فهمت ان اكتر نظام يناسبني هو ال Lease لاني اقدر ارجع الفلوس دي من الضرائب خصوصا اني صاحبة عمل حر، و كمان مناسبة جدا في الاول وبعد ما تخلص المدة و هي ال 4 سنين ممكن ابقى افكر في نظام تاني وقتها..
و اتفقت معاه و دفعت 3 الاف من ال 3250 اللي كانوا معايا و قال لي:
“تمام كده هتدفعي اقساط على اربع سنين.. بس لازم تعملي التأمين الأول قبل ما تستلمي العربية .. و اديكي معاكي اسبوعين اهو..”
طبعا موضوع تأمين العربية و خصوصا في مقاطعة اونتاريو مش ارخص حاجة و لا احسن حاجة..
و فهمت ان دي المهمة اللي بعد كده..
طبعا كنت سعيدة جدا بالموضوع ده و كفاية اني هترحم من عذاب المواصلات اللي بقت بتاخد وقتي كله، بس علشان اودي ابني للحضانة واخده منها علشان اركز في شغلي اللي هبدأ فيه و اعمله بجد..
و فضلت مخبية على ماما موضوع العربية وقلت مش هقولها الا لما العربية تكون تحت البيت و فعلا ده اللي هيحصل..
و وصلت لشركة تأمين ممتازة كانت هي اللي أمنت لي على البيت اللي كان اجباري و من شروط ال (كو اب) اني اكون مأمنة علي.. اسمهم cooperators و لأني مأمنة عندهم البيت فتأمين العربية من خلالهم سعره ممتاز و الأرخص و ادوني سعر 195 دولار في الشهر و ده أحسن عرض من عروض تانية لقيتها كان اقلها 350 دولار في الشهر..
و في نفس الاسبوع و قبل ما يخلص شهر أبريل عملت لوجو لمكتبي، وموقع انا اللي عملته بنفسي على موقع (wordpress).. بس طبعا دفعت ثمن تسجيل ال Domain و انطلق موقع شركتي الإلكتروني www.b2bconsultancy.org
و في نفس اليوم عملت صفحة على الفيس بوك، و بمجرد ما خلصتها لقيت اعلان لفت نظري جدا..
كان الإعلان عن فعالية اسمها B2B يعني على اسم مكتبي، و كان اللي منظمها الغرفة التجارية لمدغشقر في تورنتو
بعت لهم فورا، و سجلت اسمي، وعرفت ان الايفنت ده كمان 5 ايام..
يا ترى استعديت ازاى للإيفنت ده؟ و هل هيجي من وراه شغل زي ما توقعت ولا لأ؟

5