حاولت اربط الخيوط ببعض و ابدأ أفسد على روميو خطته، و بدأت الأول بمستشارة العلاقات الزوجية و اللي عرفت من الايميلات بينه وبين المحامي انه ناوي يروح لها و يجيب منها جواب بأني كنت بروح عندها، اعتقادا منه ان دي حاجة يستخدمها ضدي..
و كلمتها فورا و قلت لها:” اسمعي احتمال روميو يكلمك علشان ياخد منك جواب عايز يثبت به اني غير متزنة نفسيا علشان يحاول يأثر على قرار القاضي فيما يخص الحضانة الكاملة”
ردت و قالت لي:” لا مش من حقه ياخد مني جواب عنك الا بموافقتك، وعموما كويس برضه انك قولتيلي”
كان كمان من مصلحتي اني انكش الجار الخبيث اللي هيتحالف معاه، و من نفسي بعت له رسالة وقلت له:
“انا عارفة انك رايح تشهد علي في المحكمة بس انا عاملة احتياطاتي و لو رحت انا عندي كل الرسايل اللي بيني و بينك، و كنت بطلب منك انك تمشي بالذوق و انت اللي ضايقتني لحد ما جبت البوليس … حبيت بس افهمك انك لو عملت كده هتجيب لنفسك وجع الدماغ، و انا عارفة انت بتعمل ايه من وراء ضهري”
و بصراحة ما همنيش انه يروح يقول لروميو، أو أنهم حتى يشكوا اني بقرأ الرسايل.. المهم اني اخوفهم و افهمهم اني هقفلهم في زورهم لو حاولوا يضايقوني..
أما صاحبة البيت فتجاهلتها تماما لان كفاية اصلا اللي بيني و بينها..
و بكده انا مستعدة نفسيا للجولة دي..
و رحت المحكمة، و حطيت اعصابي كلها في تلاجة و انا مستنية روميو و خطته اللي أفسدتها عليه..
و لقيته جاي مع المحامي بس، و لا شهود، و لا حاجة..
و ماجابش سيرة اي حاجة نفسية لا هو ولا المحامي، لكن موضوع الحضانة اتأجل للجلسات الجاية..
و كان القرار للنفقة و هنا قررت القاضي الاتي:
“وفقا لوضع الاب و وجوده في البلد بشكل غير قانوني و اعتباره عاطل عن العمل.. يتم الحكم بنفقة الطفل على أساس الحد الأدنى و التي تقرره المحكمة ووفقا لقانون المقاطعة.. فمبلغ النفقة يكون: 195 دولار شهريا”
ده كان الحكم، وكان حكم نهائي ..
و رغم اني مكنتش مستنية منه اي فلوس.. إلا ان القانون قانون، و حتى لو عاطل، او مشرد فهو ملزم يدفع نفقة للطفل (Child Support) على أساس الحد الأدنى و هو ال 195 دولار في الشهر..
طبعا مكانش مبسوط و كان متخيل انه هيعفى تماما.. و هنا رد المحامي و قال:
“طيب تمام.. انا عارف إجراءات دفع النفقة اللي بتكون عن طريق مركز FRO و هساعد موكلي.. بس كده احنا ما اتكلمناش عن رؤية الطفل”
ردت القاضي وقالت:” للأسف لأن القضية فيها عنف أسري و في مع الأم إقرار بعد تعرض لازم الرؤية تكون عن طريق مركز الحكومة اللي لازم موكلك يروح و يسجل فيه بنفسه و بعدين يستنى لما ييجي دوره لأن قائمة الانتظار عندهم طويلة جدا، و ممكن ياخد من 3-6 شهور لحد ما يكلموه علشان يحددوا له مواعيد زيارة الطفل”
و علشان خاطرهم أصدرت إقرار خاص بالرؤية و انا مكنش عندي اي مشكلة فيه.. و خدت نسخة و هو كمان، لكن التسجيل كان لازم يقوم هو به و يدفع فلوسه كمان و اللي حوالي بيكون 200 دولار..

و أتأجلت جلسة الحضانة شوية لأن القاضي كانت عايزة تعرف ايه اللى هيتم في وضع روميو، و هل هيكمل في كندا و لا هيترحل..
و سألت محامي روميو:” لازم اعرف وضعه القانوني في البلد إيه؟”
قال لها:” موكلي قدم على الإقامة بس قضية مختلفة تماما ملهاش دعوى بالكفالة القديمة اللي كانت مسؤولة عنها أم الولد”
و طبعا هنا كان لازم افهم القصة الجديدة دي ايه؟ و بيعمل ايه بالظبط!
و اصبحت الأمور معلقة خصوصا فيما يتعلق بقرار الحضانة الكاملة، لكن أقرت القاضي بالآتي:
“الجلسة الجاية واللي هتكون في أبريل هيكون فيها حكم مؤقت بالحضانة بناء على الملف و كل اللي هدرسه عن القضية”
و بكده عرفت اننا راجعين في ابريل يعني كمان 3 شهور من النهاردة..
و خلصت بشكل مؤقت من موضوع محكمة الأسرة، و لازم ارجع اركز على موضوع السكن اللي خلاص فاضلي اسبوعين وأكون لقيت حاجة تانية..
و من تعقيد الموقف و قلة الفلوس و كوني بدأت اكون على ال OW بدأ يكون السكن شبه مستحيل..
و هنا حاولت اتنازل عن فكرة اني ما اكملش بيزنس و اشتغل و خلاص ..
و كلمت مشرفي القديم في الشغل و اللي كان راح شركة تأمين جديدة في دوان تاون و قال لي:
“فعلا فيه وظيفة حلوة جدا في الشركة و هرشحك لها”
و حاولت احط في دماغي اني استعد لمقابلة الوظيفة و في نفس الوقت ادور كمان على حلول بديلة..
حاولت أمن نفسي من كذا جهه و هنا حطيت خطة و كانت:
1- اتصل بالإسكان و اطلب منهم مد فترة السماح ل 1 مارس بدل من 1 فبراير و بكده يكون عندي وقت اكتر
2- ادور على جهة تساعدني في أنها تدور معايا على سكن عادي لحد ما ييجي سكن الحكومة و تكون تبع للبلدية.. و ممكن يكون عندهم ضامن في حالة أي سكن طلب مني موضوع الضامن ده
وفعلا وافق الإسكان على مد فترة السماح و اني ممكن اقعد في بيت الأشباح لحد 1 مارس و تحت حمايتهم
أما الجهة اللي لقيتها فكان قسم (خدمات إسكان الطوارىء) وده مقرة في بلدية تورنتو، و سجلت معاهم و بعتولي موظفة لحد البيت و جت علشان تفتح لي ملف معاهم.. و قالت لي:
“احنا ممكن نساعدك في أننا نوجهك لوحدات ارخص شوية من السوق و في نفس الوقت بنساعدك بشوية فلوس لو ما معكيش فلوس أول و آخر شهر من الإيجار.. كمان ممكن نضمنك..” و ده حقيقي كل اللي كنت عايزاه
بس من شروط الخدمة أن يكون قدامي على الاقل شهرين، و مش لازم اطلع فورا من المكان اللي عايشة فيه..
و فهمتها وضعي بالظبط و ان قدامي شهر و نص .. و هي استوعبت و تفهمت تماما و قالت لي:
“مفيش مشكلة، و عموما لو جه 1 مارس ومفيش حاجة حصلت ابقي اطلبي من الاسكان مد كمان شهر.. حاولي معاهم و هم هيوافقوا اكيد”

و بصراحة اطمنت جدا لما الست دي بقت معايا و حسيت انه مش لازم اشتغل والأفضل اني اكمل في موضوع البزنس اللي لسه فيه برنامجين عايزة اقدم فيهم و كان منهم في نهاية يناير عن طريق مؤسسة Access، والثاني من نهاية فبراير لنص ابريل و اللي تبع بلدية تورنتو..
لكن علشان ادي لنفسي فرصة اخيرة مع الوظيفة قررت اني اروح المقابلة، و اللي حاولت استعد لها على قد ما أقدر..
يا ترى المقابلة دي عدت إزاي؟ و هل هتوظف ولا لأ؟

9