و رحت قابلت الشابة اللي كانت أدتني ميعاد اقابلها.كانت متحمسة جدا إنها تسمع مني إيه اللي حصل من ساعة ما شافت بعينها العضة، ووصلت لفين من ساعتها، وكان عده حوالي أسبوعين من تاريخ الواقعة دي..
و اتفاجات اني داخلة و كنت نقيت فستان صيفي حلو جدا و كنت مسبسبة شعري على الأخر، وعجبها جدا شكلين، وقالت لي:
“أنا مبسوطة جدا إني شايفاكي كده… احكي لي إيه اللي حصل معاكي”
و حكيتلها على كل حاجة.. بما فيها قصة روميو، وقصة حماتي اللي لسه قاعدة معايا..
كانت مستغربة جدا، وقالت لي:”احذري من حماتك، وبصراحة قعدتها معاكي مش مريحاني، ومش شيء منطقي، ولا طبيعي”
حاولت أوضح لها وجهة نظري إنها استنجدت بي، وكان صعب علي اطردها بصراحة، لكن طبعا الأجانب تفكيرهم بيكون غيرنا خالص في الأمور دي، ومكانتش مقتنعة بكلامي خالص..
و سألتني سؤال مباشر و قالت لي:” ناوية على إيه مع جوزك؟ هترجعي ولا هتسيبيه؟”
قلت لها:” هسيبه طبعا.. بس أنا لسه مش مرتبة أفكاري”
قالت لي:” تمام، و انتِ جيتي هنا، و هنرتب أفكارنا مع بعض”
و بدأت تشرح لي على أهمية إني أبدأ بمحكمة الأسرة زي ما قال لي المغربي تمام، وقالت لي:
“الطلاق في كندا مختلف عن بلدك الأم، وأنا هعرفك الخطوات..مبدئيا انتِ محتاجة تقدمي على قضية حضانة الطفل الأول لأن فيه طفل، وبعد ما يتحكم فيها حكم نهائي و يعدي على انفصالكم الجسدي المثبت بعناوين مختلفة أو إقرار منكم بكده.. بتقدري ترفعي دعوى الطلاق”
و فهمت إن فعلا مربط الفرس هو محكمة الأسرة، وقضية الحضانة ..
و سألتها:” طيب أجيب محامي منين؟”
قالت لي:” انتِ قولتيلي انك في أجازة الأمومة و دخلك يصنف قليل لأنه مش زي دخلك أيام ما كنتي بتشتغلي، وبالتالي من حقلك مساعدة قضائية، والمحامي الدولة بتغطية.. بس محتاجة تقدمي على طلب اسمه (ليجل ايد)..
وأدتني (ريفيرال) أو زي شهادة من عندها كخطاب دعم، و اتصلت برقم (ليجل ايد) اللي قعدوا معايا ساعة بالظبط على التليفون، و خدوا مني بيانات كتير جدا و بعدها قالوا لي:
“هنبعتلك شهادة على الإيميل هيكون فيها عدد الساعات اللي وافقنا عليها علشان قضية الحضانة و النفقة كمان..”
و في نفس اليوم جاتني الشهادة، واتوافقلي على 24 ساعة مدفوعة من الدولة، و طبعا ساعة المحامي هنا في حدود 200 دولار يعني الشهادة دي بقيمة: 4800 دولار..
بس الخطوة اللي بعد كده إني بنفسي اللي أدور على محامي.. ويكون محامي بيقبل النوع ده من الشهادات، أو إنه يتم تسديد أتعابه عن طريق (ليجل ايد) و ده طبعا مش كل المحامين بيوافقوا عليه..
يومها و أنا راجعة البيت، و بعد ما أنجزت خطوة مهمة جدا لقيت جارتي اللي عندها البيبي و اللي بتساعدني و تقعد مع ابني وقت ما احتاجتها قبل كده كانت قاعدة مع واحدة صاحبتها عندها طفلين قدام البيت، وقبل ما أطلع قالت لي:
“انتِ وصلتي لايه في موضوعك؟”

و حكيتلها على إني هبدأ في قضية الحضانة بس محتاجة أدور على محامي..
و هنا ردت صاحبتها و قالت لي:
“أهلا بكِ في الجروب.. يعني انتِ بقيتي سينجل مام”
كنت عايزة أقول لها هو أنا حاسة إني سنجل مام من أول ما ولدت، بس تقصدي إيه بجروب السينجل مام؟!
قالت لي:” ده جروب كبير على الفيس بوك و هدخلك فيه لو عايزة، وهتستفيدي منه كتير”
و سألتها:” انتِ كمان سنجل مام؟”
ضحكت و قالت لي:” على فكرة معظم الستات في كندا سنجل مام.. انتِ بس اللي باين عليكي جديدة في الحوارات دي.. بكرة تفهمي إن معظم الستات هنا سنجل مام، وده حقيقي مش هزار..”
لفت نظري من أول نظرة حاجات كتير في صديقة جارتي من أهمها: إن قلبها ميت، وبتتكلم بجبروت.. لكن كان عندها حاجة غريبة لاحظتها على طول إنها ما عندهاش القدرة تبص في عين الواحد، و دي خلاني احسها يا أما بتكدب، يا أما مخبية حاجة.. المهم إن وراها دايما قصة، أو حقيقة غير كاملة..
و فعلا دخلتني الجروب، ولقيت نفسي وسط أمهات كتير بيتكلموا في مواضيع مكنتش فاهماها لأنها كلها جديدة علي، لكن انا عملت إعلان على الصفحة و سألتهم على محامي يقبل (ليجل ايد)، و فعلا رشحولي اكتر من محامي ومحامية، و اخترت واحدة في دوان تاون و حددت معاها الميعاد إني اروح لها تاني يوم على طول..
كانت حماتي في الوقت ده بتحاول تتجسس علي وتعرف أخباري للأسف.. و برغم وقفتي معاها، لكن ردها للجميل هيكون سيء جدا..
و تاني يوم و أنا راجعة من عند المحامية اللي حقيقي ما ارتحتلهاش وحسيت اني اتسرعت لما اخترتها.. الكويس في الموضوع انه كان لسه عندي فرصة إني أغيرها.. و فعلا هغيرها في أقرب وقت ممكن… كانت حماتي بتكلم جوزها فى إيطاليا و مكانتش واخدة بالها إني رجعت البيت انا و البيبي اللي كان نايم، وسمعتها بتقول له:
“لا متخافش علي.. أنا ما بصرفش أي فلوس في البيت ده.. هي اللي بتجيب الأكل، والشرب، والإيجار طبعا أنا ما بدفعش حاجة فيه، و لو جبت أي حاجة زيادة بخبيها تحت سريري”
و لقيتني قدامها زي القضاء المستعجل، و بصتلها و قلت لها:” لما تخلصي مكالمتك أنا لي كلام معاكي”
اللي كان مضايقني جدا إنها كانت بتطلب مني حاجات اجيبها لها وعمري ما طلبت منها فلوس.. حتى أوقات كتير تقول لي:” هاتي لي شوكولاته معينة و أجيب لها اللي هي عايزاه .. يعني مشيت معاها بمبدأ إكرام الضيف واجب، لكن الأجانب فعلا غيرنا، وخصوصا العيلة دي..”
و بدأت كلامي معاها و قلت لها:” انتِ بتعملى معايا كده ليه؟ أنا قصرت معاكي في حاجة؟ واحدة غيري كانت صممت انك ما تكونيش في البيت، لكن أنا استضافتك و كرمتك، و كمان بجري معاكي في كل حته علشان اطلع لك ابنك من السجن اللي هو أتعدى علي في الأساس.. دي نتيجة المعروف؟ ليه؟ فعلا مفيش فايدة!”
كانت مكسوفة جدا و مش لاقية كلام تقول له، ولقيت نفسي بقول لها:
“انا اسفة مش هقدر أستضيفك اكتر من كده.. بعد إذنك شوفي مكان تاني”
و اتفاجأت انها راحت جابت لي جارتي اللي كانت بتفهمها شوية علشان كانت بتتكلم أسباني، وحاولت تخلي جارتي محضر خير، و تتوسط لها علشان ما اطلعهاش من البيت..

و وافقت إنها تقعد، لكن حطيت شروط إنها ملهاش دعوى بي خالص، و تبطل تجسس علي، و كل واحد ياكل لوحده ،وهي من ناحيتها قالت لي:
“و أنا هساعدك في تنظيف البيت، و هقعد لك بالولد لأن عندك مشاوير كتير أنا ملاحظة”
و في النهاية اتفقنا على كده،و فعلا كنا عايشين زي الأغراب تحت سقف بيت واحد..
طبعا في كل ده كان معانا كمان الشاب اللي ساكن اللي من حسن الحظ مكنتش بشوفه، لكن لاحظت إني لما بعدي من قدام اوضته كانت بتكون ساقعه جدا و طالع منها ريحة غريبة.. لحد ما في يوم قررت إني افتحها و هو مش موجود .. يا ترى لقيت ايه في الأوضة؟

8