كان الوقت ده بالظبط نص شهر نوفمبر وكان جارنا الأسباني مقرر انه يروح من يوم 15 ديسمبر 2017 ليوم 15 يناير 2018، يعني لسه قدامنا شهر بحاله علشان نقرر.. و قعدت مع روميو و جارنا على ترابيزة السفرة و بكل قلب جامد قولتلهم:
“أنا شايفة انه من العدل انك تروح و ما تدفعش تمن الاوضة لمدة شهر واحنا هنتصرف الشهر ده و نحاول نأجرها بشكل يومي أو أسبوعي”
كان روميو متغاظ مني جدا لكنه أتكسف يرد قدام جارنا و بعد ما جارنا شكرني على كلامي جه روميو و قالي:
“اعملي حسابك لو ما عرفتيش تأجريها انت اللي هتشيلي الفرق، أنا ماليش دعوى بالكلام ده”
كنت مجمدة قلبي جدا و كنت حاسة إني هعرف أجرها و أعوض الفرق، و في نفس الوقت قدام ذوق و أخلاق الجار ما حبتش اضحي به و تمسكت به لأنه أفضل حد سكن معانا.. و بمنتهى الثقة جاوبت روميو و قولتله:” ما تقلقش أكيد هنعرف نأجر الأوضة”
كان غياب روميو من شغله أكتر من أي وقت في الأسبوع ده و لما سألته عن السبب قالي:
“ضهري واجعني.. أنا كده لما البرد بيدخل ضهري بيألمني جدا”
قولتله:” خلاص احجز ميعاد مع مصحح العظام و كمان نحجزلك مساج”
كنت بتعامل معاه إني مديرة أعماله و امه اللي مدلعاه اللي لازم تحجزله كل حاجة و تروح معاه كمان..
و فعلا كنت بعمل كده علشان اضمن انه كويس و أنه من الأساس ما بيضحكش علي لأني مش عارفة ليه بدأت احس انه بيمثل علي!
أما على مستوى الشغل فكانت الأوضاع سيئة جدا و الشغل كتير للغاية و مرهق كالعادة و الكاريبية و الهندية واقفيلي على الواحدة.. و كل ده و أنا مطنشة و بحاول امشي حالي لحد ما أشوف هعمل إيه في موضوع أجازة الأمومة دي..
و أخيرا عينوا اثنين في القسم: كانت واحدة إيطالية من ميلانو شابة في عمري، و الثاني كان رجل صيني كبير في العمر مقارب على نهاية الخمسينات..
كانت الإيطالية نشيطة و حركة، أما الصيني فكان بيتحرك بالتصوير البطيء و طبعا توقعت انه لما يبدأ يشتغل هيكون وجوده زي عدمه..
و لكن كانت فيه حاجة كويسة جدا ومنتظرة الموظفين في بداية شهر ديسمبر.. و هي إن في حوافز هتتصرف للكل و هي نسبة من أرباح الشركة و بشكل تقديري عرفني المشرف إني هيطلعي في أول ديسمبر حوافز قدرها ألف دولار طبعا غير المرتب بتاعي.
كنت فرحانة جدا بموضوع الحوافز دي، و بمنتهى السذاجة جريت على روميو في نفس اليوم و حكيتله و قالي:
“و ناوية تعملي إيه بالفلوس دي؟”
قلت له:” دي فلوس زيادة عن مرتبي و بفكر اعمل اكتر حاجة بحبها و وحشاني في نفس الوقت..”
سألني:” و إيه هي؟”
قلت له:” نفسي أسافر أي مكان إن شاء الله حتى أمريكا أهي قريبة”
قالي:” يا سلام! طيب ما أنا كده مش هعرف أسافر معاكي !!انت ناسية إني مش قاعد قانوني في كندا و لو طلعت منها مش هعرف ادخلها تاني”

قولتله:” اه عارفة.. علشان كده أنا واثقة انك مش هتعترض إني أسافر لوحدي”
حسيته متفاجىء جدا من صراحتي و طريقتي و أنا بطلب منه بمنتهى البساطة و من غير أي عقد إني أسافر لوحدي..
قالي:” إيه يا روزة ؟! انت متجوزة رجل.. يعني إيه تمشي و تروحي تتفسحي في بلد لوحدك؟ و بعدين أقول لأهلي إيه انا! ده لو أمي عرفت حاجة زي كده هتبهدل الدنيا”
ابتسمت ابتسامة كلها سخرية من كلامه و حسيته انه فاهم الرجولة غلط و أنا كنت حاسة في الوقت ده إني أم لطفل مش زوجة لرجل ..و رديت عليه بهدوء كان هيفرسه و قلت له:” معلش قولها أي حاجة.. قولها إني رايحة سفرية شغل.. بس أنا مصممة إني اروح اتفسح.. أنا اتخنقت من كل حاجة هنا، و من ضغط كل حاجة علي.. بصراحة محتاجة اخد راحة، و ما تنساش إني قريب هبقى أم و فكرة إني أسافر خفيفة كده و لوحدي مش هتكون موجودة في قاموسي بعد كده”
رد و قالي:” ماشي يا روزة.. اقنعتيني”
و بالرغم انه قالي كده، لكن كان بيخطط إزاي يضايقني و ياخد مني فلوس الحوافز علشان اصرف على البيت زي ما كل مرتبي بيتصرف على البيت، لكن أنا المرة دي صممت ونفذت اللي في دماغي..

و رجوعا للشغل كنت في الفترة دي تعرفت على زميلة لي كانت حامل برضه و كانت رومانية.. كانت شابة لطيفة جدا من قسم التحصيلات و كانت دايما بتسألني عن السبب أنها دايما بتشوفني مخنوقة و مكشرة و أنا في الشغل و أول ما انزل من المكتب ابتسامتي ترجعلي، و كنت برد عليها و أقولها:
“أنا بكره المكان ده جدا ، بالنسبة لي عامل زي السجن و حاسة إن طبيعة الشغل دي مختلفة عني تماما و محطمة نفسيتي”
و حكيتلها عن أيام دبي و أخر شغل لي و مغامراتي حتى لما فتحت بيزنس هناك لوحدي..
كانت متعاطفة معايا جدا و هي نفسها كانت مرت بتجربة شبيهة، و أصلا ما عرفتش تطلع من خدمة العملاء إلا بعد 4 سنين من العذاب علشان تروح قسم التحصيلات..
و من ضمن دردشتنا سألتني:” انت ناوية تاخدي أجازة الأمومة امتى؟”
قولتلها:” مش عارفة .. أنا متحددلي ميعاد ولادة تقريبي يوم 21 مارس، لكن أنا مش هقدر اقعد أبدا لحد الأخر خصوصا إني مش طايقة المكان، و لا الشغل، والمواصلات هدتني، و الجو بقى بارد جدا”
قالت لي:” اسمعي انت من حقك تقعدي شهرين قبل تاريخ الولادة، بس في قانون هيطلع قريب و هيكون يوم 3 ديسمبر و احتمال كبير المدة دي تكون 3 شهور بدل شهرين”
بصراحة لما قالت لي كده عينيه لمعت و فرحت، بس احتفظت بأفكاري لنفسي علشان الموضوع محتاج تخطيط على مياة بيضاء..
و في نهاية الأسبوع لقيت روميو بيحاول يلطف الجو معايا ويقولي:” مش عايزة تخرجي؟”
قولتله:” ياريت”
و فورا فكرت في مكان كان قريب و كان عامل جلسة تصوير مع بابا نويل مع الحيوان الأليف و صاحبه ، و فعلا خدت روميو و القطة بتاعتي و اتصورت مع بابا نويل و قطتي، بس طبعا روميو مكانش في الصورة..
وقتها افتكرت في نفس التاريخ ده و اللي كان يوم 18 نوفمبر بس السنة اللي فاتت لما كنت مساعدة سانتا و حلمت و تمنيت إن السنة الجاية يكون معايا بيبي أتصور به مع سانتا.. وفعلا تحققت الأمنية، و كان البيبي في بطني، و قطتي بين أحضاني، و روميو خارج الإطار..

و عند التاريخ ده هبدأ اجمع معلومات اكتر و اخطط لموضوع إجازة الأمومة اللي برضه هتتحدد بعد تاريخ 3 ديسمبر.. يا ترى فعلا تم تعديل القانون و لا لأ؟

5