و مسكت ورقة و قلم، و حاولت أكتب و أقسم و أخطط يومي خلال شهر رمضان صح

حاولت يكون شهر جامع بين اني أركز إني أشتغل مع العميلة الجديدة اللي هتمضي كمان 3 أيام تعاقد مهم معايا، و انه يكون برضه شامل جزء روحانيات رمضان،و طبعا عنايتي بابني، و أخيرا تسويقي للكمامات..

و نجحت في وضع جدول أسطوري كان بالنسبة لي جدول مميز جدا، و قسمته بالشكل ده:

7:30 ص- 8:00 ص ميعاد الصحيان

8:00 ص- 8:30 ص ميعاد الشاور

8:30 ص- 9:00 ص ميعاد الفطار لأبني و للقطة

9:00 ص- 11 ص ميعاد الشغل بالنسبة لي و بالنسبة لإبني أول ساعة كارتون، و الساعة التانية لعب حر بدون كاروت مع اختيار ألعابه المفضلة

12ظ- 1:30 ظ ميعد الغداء لإبني و حمامه

1:30 ظ- 2:00 ظ ترتيب البيت بالنسبة لي، و تكملة اللعب لإبني

2:00 ظ- 4:00 ع ميعاد القيلولة للطفل، و بالنسبة لي ساعة قيلولة، و ساعة أخرى روحانيات رمضانية

4:00 ع- 5:30 ع استكمال الشغل بالنسبة لي، و موسيقى للطفل

5:30 ع – 7:30 م روحانيات رمضانية، و فيديوهات تعليمية للطفل

7:30 م- 8:00 م استرخاء مع امكانية مشاهدة التليفزيون

8:00 م- 9:00 م تحضير الإفطار مع حساب وقت الإفطار

9:00م- 10:00 م تليفزيون – نوم الطفل

10:00 م-11:00 م روحانيات رمضانية أو استكمل للشغل (على حسب اليوم)

11:00 م – 4:00 ص نوم

4:00ص- 5:00 ص سحور

5:00 ص- 7:30ص نوم

و فعلا نجحت إني أمشي على الجدول ده بحذافيره، و ما اضيعش أي دقيقة من غير ما ابقى مخططة لها و حاسباها… لأن الوقت من دهب
و بعد كم يوم من رمضان بدأت أعدل الميعاد اللي من 2:4 واخلي فيه ساعة تمشية على البحيرة مع الولد

كنت متحمسة جدا لوجود ابني في البيت في وقت رمضان، و كنت بحاول كمان أعمل مظاهر الشهر الكريم..

و زينت البيت على قد ما قدرت، و بدأت اتعلم وصفات حاجات كتير من أكلات رمضان.. و أكتر حاجة كان نفسي اتعلمها هي: القطايف

و نجحت في عمايلها، و فعلا عملتها في البيت، و كانت تجنن

و لأن كل حاجة كانت قافلة بما فيها الصالونات، و الحلاقين.. فكملت بقية التعليم المنزلي، و قمت و قصيت شعري بعد ما شفت لي كم فيديو على اليوتيوب اتعلم منه، و بعدها قمت و قصيت كمان شعر ابني…

كنت بحاول اشغل نفسي، و في نفس الوقت اي حاجة كنت بحتاج اعملها بره كان لازم اتعلمها.. و احولها لشغل بيتي

و عديت كم يوم من أيام رمضان … لحد ما جه يوم 28 أبريل اللى هيحصل فيه موقف هيكون بداية ميلادي ككاتبة…

يا ترى إيه هو الموقف اللي فجر كل مواطن الإبداع اللي جوايا؟

6