و دخلت على موقع ال (سي ار إيه) علشان اقدم على فلوس الطفل و المعروفة بأسم (سي سي بي)..
و مليت الاستمارة، و لكن كان فيه بيانات خاصة بالأب و من أهمها رقمه التأميني و هنا طبعا مقدرتش أحط رقمه لأنه قاعد مخالف و ملوش رقم تأميني في البلد..
و سيبت خانته فاضية و كملت كل البيانات اللي خاصة بي و قدمت الطلب..
و جالي الرد سريع جدا بأنه مطلوب مني أني أبعث استمارة مفصلة عن الأب فيها معلومات كتير جدا من أهمها:
تاريخ دخوله كندا و نوع الفيزا اللي معاه من الأول
رقمه التأميني القديم حتى لو كان على إقامة مؤقتة
دخله السابق و الحالي
و طبعا توقيعه هو شخصيا..
و حاولت أملى كل البيانات بنفسي و اخد له هو بس الاستمارة على التوقيع كالعادة..
و فعلا عملنا كده و بعت الأوراق دي بالبريد..
وكانت المفاجأة انه جالي جواب بينص على التالي:
“وفقا للقانون الحالي سوف يتم تعطيل فلوس الطفل (سي سي بي) لحين تعديل وضع الأب ”
بصراحة أتضايقت جدا من الجواب ده و كلمتهم في التليفون و سألتهم .. يعني كل الناس اللي في كندا علشان تقدم على الفلوس دي لازم الطرفين يكون عندهم إقامة؟
وقتها الرد كان :” آه و ده قانون بيتدرس حاليا و بصدد التغيير بس لحد دلوقتي لازم الطرفين يكونوا عندهم أقامة أو قاعدين بشكل قانوني، لكن في حالة الأم معندهاش زوج لأي سبب من الأسباب فبنكتفي بها هي فقط”
و بكده فهمت إن الفلوس دي مش هاخدها إلا لما روميو ياخد الإقامة، و فورا قلت له على الحكاية دي و قال لي:
“ خلاص مش مشكلة انتِ ناسية إن إقامتي هتطلع في يوليو أو أغسطس بالكتير يعني كلها شهرين مش مشكلة”
و فعلا أنا هرجع أقدم عليها في أغسطس بس السبب هيكون مختلف تماما..
وبدأ العد التنازلي يعد و أنا خلاص هروح بالبيبي مصر كمان أقل من أسبوعين و كل ما افتكر الحكايه دي قلبي يتنطط من الفرحة..
و فكر روميو و قال لي:
“اسمعي يا روزة .. انا جاتلي فكرة”
قلت له:” إيه هي؟”
قال لي:”أنا هبعت لأمي تيجي تقعد معايا شوية لحد ما ترجعوا من مصر و تكمل اجازتها معانا كلنا”
قلت له:” و ماله! فكرة حلوة طبعا و أكيد وحشاك جدا”
قال لي:” طبعا أمي وحشاني جدا و مش متخيل إني هشوفها تاني بعد ما كندا حرمتني من أهلي فترة كبيرة”
كان دائم اللوم على كندا بدل ما يلوم نفسه، و في الأخر هو اللي حط نفسه في الموقف ده لسنين مش كندا نفسها..
و كلم الأم اللي كانت فرحانة جدا وقالت:” خلاص انا هحجز و هاجي يوم 1 يوليو”
أما أنا فكنت خلاص هسافر يوم 21 يونية و هرجع يوم 12 يوليو يعني روميو هيقعد مع مامته 12 يوم من غيري..
و لأن الفترة دي كان متزامن معها رمضان بس طبعا مكانش له أي مظاهر و لا معالم في بيتنا فتقريبا محستش به، لكن انتبهت إن يوم 15 يونيو هو أول عيد الفطر و خدت البيبي و فسحته و رحت جيبت قهوة و بسكوت و قعدت به في الجنينة و صورت فيديو قصير نشرته على صفحتي على الفيس بوك و كانت أول مره البيبي يظهر معايا و كان بقى عنده شهرين و نص..
و جه روميو و عيد علي و قال لي:
“أنا عازمك على العشاء انتِ و البيبي بمناسبة عيد الفطر”
واخدنا و عزمنا في مطعم مكسيكي كان جنب البيت، و حاولت أتظاهر معاه بالسعادة اللي طبعا مكانتش حقيقية ولا موجودة من الأساس..
كان بيحاول يكون هادي و رومانسي على قد ما يقدر. كمان كان متحمس جدا لفكرة إن الإقامة قربت تطلع و كان ناوي إني أول ما ارجع من مصر اروح اقدم على فيزة إيطاليا علشان نرجع كلنا مع أمه على إيطاليا… بعد طبعا ما تطلع له الإقامة الموعودة..
و بدأ كلامه معايا و قال لي:
“أنا مش عايزك تفكري أبدا في الفكرة اللي قلتيها لي قبل كده إنك تسيبيني.. إنتِ عارفة لو سبتيني أنا أموت من غيرك”
كنت مش مصدقاه خالص و كلامه ما بقاش له أي معنى و قال لي:
“أنا عارف إني غلطت كتير بس إنتِ شايفاني أنا بحاول أتحسن و بعد الإقامة هتولد من جديد”
طبعا كلام فارغ محدش هيتولد من جديد علشان كارت إقامة، و اللي بيتغير بيتغير علشان نفسه في الأول مش علشان حد تاني..
مكنتش بعلق خالص و كنت بكتفي بابتسامة صفراء و خلاص..
و بدأت أجهز شنطي للسفر و الهدايا و اللذي منه..
بس قبل السفر بأيام بسيطة لفت نظري إعلان على مدخل محل المصوراتي اللي قربي من البيت و كان عامل عرض انه يعمل فوتو سيشن(جلسة تصوير) لأطفال الحي اللي لسه مولودين و اللي عمرهم لا يتعدى ال 6 شهور مجانا و هي في الأساس تمنها 200 دولار..
و فورا دخلت و حجزت للبيبي و رحت قلت لروميو اللي شجعني وقال لي:” حلوة الفكرة دي”
و بدأت أفكر في الملابس اللى هيلبسها البيبي علشان اعمله أول (فوتو سيشن) خاصة به..
يا ترى الجلسة دي كانت عاملة إزاي؟

9