فكرت إني أسافر مصر بعد ما ماما تسافر على طول لأسباب كتير.. من أهمها إني اعمل سبوع للبيبي على حق و اعرفه على عيلته، و أجدد ترخيص الإرشاد السياحي الخاص بي، و كمان أبعد عن روميو شوية..
و لأن خطوة زي دي محتاجة استعدادات فكان لازم أشوف هبدأ بأيه الأول.. و كانت أهم نقطة هي إني أصدر باسبور للبيبي علشان يقدر يسافر مصر..
و استنيت بالظبط كم يوم لحد ما جت شهادة ميلاد البيبي في البريد بعد شهر بالتمام و الكمال من يوم ما قدمت عليها و أنا لسه في المستشفى و بدأت اجمع الطلبات و كانت:
1- شهادة الميلاد الكندية الأصلية
2- استمارة أطبعها و املأها و أوقعها أنا و باباه
3- صور باسبور للبيبي
4- أروح أقدم الأوراق في مكتب الجوازات و أدفع الرسوم
طبعا شهادة الميلاد كانت طلعت، و الاستمارة جبتها و مليتها و كانت فاضلة بس على توقيع الأب اللي بيبقى جنب توقيع الأم و هنا رحت لروميو و قلت له:
“أنا عايزاك تمضي الاستمارة دي علشان عايزة أطلع باسبور للولد بعد إذنك”
بصلي باستغراب شديد و قال لي:
“و مستعجله ليه؟! بعدين أول سفرية له لازم تكون لإيطاليا مش مصر”
و بمنتهى الرقة و النعومة رديت عليه و قلت له:
“أكيد دي حاجة أساسية بس أنت عارف الإقامة لسه ما طلعتش و أوعدك أول ما تطلع هنروح إيطاليا فورا، بس خليها معلش المرة دي يروح مصر الأول علشان لازم أجدد ترخيص الإرشاد بتاعي لأن له تاريخ للتجديد”
و طبعا بالهدوء و المحايلة وافق و قال لي:
“أنا رجل طيب و الله مع إني خايف من حكاية الباسبور دي.. مش يمكن تهربي بالولد! يلا هاتي الورق أمضيه”
و مضى الورق و أنا سعيدة جدا و بصلي و قال لي:” تخيلي أنا بمضي و خلاص من غير حتى ما أقرا.. تخيلي لو بتمضيني إني أبيع ممتلكاتي لكِ”
ابتسمت و قلت له:” ما انت علشان عارف إن مفيش حاجة ابيعها لك بتمضي.. وفضل جوايا المثل اللي بيقول(إيش ياخد الريح من البلاط)”
قال لي:” لا ما أنا عندي ورث أبويا سابهولي بس لازم اروح ايطاليا علشان اعرف أطالب به و لو خدته أكيد ماريو هيكون له نصيب كبير منه”
طبعا الكلام بالنسبة لي مش مفاجأة و لا حاجة لأني حتى لو افترضت انه عنده ورث كنت متأكدة انه عمره ما هيعملي اي حاجة و لو أتصرف هيصرفه كله على نفسه..
و بكده بقى كمان معايا الاستمارة و فضل إني أروح أصور البيبي صورة الباسبور..

كان عمره بالظبط شهر، و لبسته و نزلت به و رحت لمصور متخصص بيصور الأطفال الرضع و كانت صورة عجيبه بس مشي حالها، و خلصنا كمان من المشوار ده..
كده فاضل إني أروح أقدم له على الباسبور، بس قبل ما أروح اتصلت بهم علشان اعرف الوقت اللي هيطلع فيه الباسبور..عرفت انه ممكن يطول حتى شهر و نص أو شهرين في بعض الأحوال إلا لو طلبت إنه أقدمه كطلب مستعجل و سألتهم .. “طيب في طلبات للطلب المستعجل ده؟”
قالوا لي:” آه.. يكون معاكي تذكرة طيران محجوزة تبين انك مسافرة في التاريخ ده”
و فعلا عملت حجز مبدأي لمصر مع البيبي بتاريخ 1 يونيو حتى تاريخ قبل اللي أنا بفكر فيه علشان أطلع الباسبور بدري و تكون حاجة مهمة خلصت منها..
و رحت بكل الأوراق بما فيها تذكرة الطيران و قدمت على الطلب و قالوا لي:
“تمام كل حاجة كاملة معاكي.. الباسبور هيكون جاهز الأسبوع الجاي”
و طبعا دي خطوة مهمة جدا و خطيرة و لازم أي أم تفكر فيها و إنها تقدم عليها أول ما أطفالها يتولدوا لأن محدش عارف الدنيا مخبيه ايه للواحد!!
كانت ماما بتستغربني إني متحركة جدا و نشيطة و ما استسلمتش إني مثلا عاملة عملية قيصرية و كانت دايما بتقولي:
“يا بنتي براحة على نفسك شوية ده انتِ لسه نفسة و ماربعنتيش”
كنت بضحك و أقول لها:” يا ماما أنا مسؤولة عن بيت كامل و طفل و معنديش الرفاهية اللي بتتكلمي عنها دي، و أنا زي ما انتِ شايفة إللي دايما بجري على كل حاجة”
كان الجو بدأ يتبدل أخيرا في بداية مايو و بدأ الربيع يهل علينا و الورود تتفتح..كان نفسي اخرج انا و ماما و البيبى نعمل (بيكنيك) و نتشمس و نستمتع بجمال الورود..
و فعلا لبسنا و تقلنا للبيبي شوية و فطرنا (كرواسون باللوز) مع القهوة، و بعدين طلعنا ناحية الجناين اللي محاوطه البيت من جميع النواحي، و رحنا أتشمسنا و أتمشينا بالبيبي و قضينا يوم جميل..
كانت غيرة روميو كبيرة من ماما و بدأ يقول لي:
“أنا حاسك مش مركزة معايا خالص و كل تركيزك على مامتك”
قلت له:” طبيعي لأنها هنا قترة قصيرة، ثانيا انت كلامك معايا خناق وبصراحة بتجنب الكلام معاك علشان ما اتوترش”
و كالعادة قعد يسمعني كلام، بس مش أكتر من كلام و ملخصه انه ندمان على معاملته لي و انه ناوي يتغير وعايز يحافظ على الأسرة دي بأي شكل..
كنت عارفة إن علاقتنا متوترة جدا، و انتهزت فرصة إني رحت للمركز الخاص بدعم السيدات في مرحلة الحمل و بعد الولادة و أتكلمت مع الممرضة و أخصائية نفسية و حكيتلها عن كل اللي بيحصل ..كان رأيها إني لازم أتكلم مع روميو في كل النقاط وأحول أوضح معاه الصورة أكتر ما أتجنبه تماما..
و استجمعت شجاعتي و حاولت أشاركه كل النقط اللي مضايقاني و من أهمها إني حاسه انه مش هيعوضني خالص، و أنه أول بس ما تطلع له الإقامة هيكون كل اهتمامه نفسه، والغريب إنه لما سمعني بقول كده ثار جدا و بدأ يعلي صوته اللي كان أعلى من أي حاجة حتى أعلى من صوت صريخ البيبي و هنا لقيت نفسي بدي البيبي لماما و لبست و نزلت لوحدي..

فضلت ماشية في الشوارع و دموعي على خدي.. كنت وصلت لمرحلة إني مش عايزة اسمع صوته، و لا مستحملة زعيقة، و لا سوء معاملته بالمرة..
و فضلت ماشية مش عارفة رجلي مودياني فين؟! بس كل اللي أعرفه إني كنت متضايقة جدا، و مشوشة، و مش عايزة اكمل حياتي مع روميو، و تمنيت تاني إن الإقامة ما تطلعلهوش..
و رجعت البيت ولقيت روميو واقف تحت البيت و عينيه في وسط رأسه و لما طلعت قال لي:
“يا ترى رحتِ تعيطي لمين؟ مين عارف يمكن تكوني رحتِ تعيطي للمغربي!”
طبعا كلامه تهمة شنيعة و هنا رديت عليه و قلت له:
“انت بتتهمني و لو ما سحبتش كلامك ده هيكون لي تصرف تاني معاك”
و سكت و اكتشفت لما طلعت إن ماما اتخانقت معاه و جه قالي بعد ما هديت:
“على فكرة مامتك قالت لي كلام كتير بالعربي أنا مش فاهمه، بس استنتجت إنها بتقول لي يا ريتها كانت اتجوزت المغربي بدل الجوازة دي”
و لما سألت ماما قالت لي
“لا أنا ما قلتش كده… أنا قلت له: لو بنتي جرى لها حاجة مش هسيبك، بس واضح إن المغربي مسيطر على تفكيره”
و سيبتله الأوضة و رحت نمت في الاوضة عند ماما مع البيبي، و قعدت افضفض لها شوية.. بس برضه حاجات محدودة مش كل حاجة أكيد..
كنت حاسة إن قصتنا هتنتهي قريب جدا،لكن هتنتهي أمتى و إزاي ده اللي مكنش عندي له أي تصور.
و بعد ما فضفضت مع ماما ارتحت شوية و لقيتها بتقول لي:
“ على فكرة بكرة خلاص هتربعني و هيكون نفاسك تم على خير”
يا ترى ماما هتعمل لي إيه علشان تحتفل بنهاية فترة النفاس؟

8